Hvert stefnir?

Nú eru nokkrar vikur liðnar síðan ég bloggaði síðast. Mér finnst einhvern veginn að ég verði að hafa eitthvað merkilegt að segja til þess að blogga! Sennilega er ekkert af því sem sett er fram hér nokkuð merkilegt en fyrir mér verður það að vera þannig.

Nú er skýrsla Vestfjarðanefndarinnar svokölluðu komin fram og kennir þar ýmissa grasa. Það fyrsta sem kemur í hugann við lestur hennar er að flestar tillögurnar hef ég séð eða heyrt um áður. Sumar eru beint úr Vaxtarsamningi Vestfjarða, aðrar hafa verið í umræðunni við ráðamenn á undanförnum árum. Það sem er nýtt í skýrslunni eru tilmæli nefndarinnar um að skoða möguleika á að setja niður á Vestfirði olíuhreinsunarstöð.

Auðvitað verðum við Vestfirðingar að skoða það af fullri alvöru, við getum ekki annað. Tillagan gengur út á það að ef þessi starfsemi verði sett hér á laggirnar þá fylgi því um 500 störf. Við höfum verið að benda á þá staðreynd að fólksfækkun er hér á svæðinu og hagvöxtur neikvæður. Þess vegna verðum við að skoða allt það sem gæti haft það í för með sér að hér yrði fólksfjölgun og hagvöxtur yrði jákvæður. Að mínu mati ber okkur skylda til þess.

Við stöndum á tímamótum núna og á næstu vikum verðum við að taka afstöðu hvert við viljum stefna. Svo einfalt er það en samt svo flókið, því að mörgu er að hyggja og mörg sjónarmið eiga eftir að koma fram sem taka verður tillit til.

Athugasemdir

[Hjörleifur Guttormsson, 22.4.2007 kl. 20:36]

Sæl og blessuð Anna Guðrún.

Það er gott að ná sambandi við þig hér í bloggheimum. Ég hef verið að leggja orð í belg um olíuhreinsunarstöðina sem verið er að ýta að ykkur Vestfirðingum. Tel mig vera þokkalega uppl´sytan um almennt atvinnuástand á Vestfjörðum og hef einnig sett mig inn í hugmyndina um olíuhreinsunarstöð. Vísa til heimasíðu minnar www.eldhorn.is/hjorleifur þar sem þú finnur nýlegan pistil um málið. - Ég ætla ekki að vera að vísa frá fyrirfram einhverri hugmynd sem getur talist raunhæf. En ég fullyrð að þessi olíuhreinsunarstöð er út í hött og því fyrr sem þú og annað gott fólk áttar sig á því þeim mun betra. Þá eruð þið ekki að eyða vinnu í eitthvað sem augsýnilega gengur ekki upp.

Bestu kveðjur                                                Hjörleifur Guttormsson